2020-04-07 MADI SIN
MADI SIN
Réf. pou antré Cf. Ps 26, 12
Pa rinmèt mouin, Granmèt,
nan pouvoua ènmi-m yo,
paské fo-témouin yo lévé kont mouin;
épi méchansté yo sé fè manti.
- Priyè
Bondié, ki gin tout pouvoua, ki égzisté tout tan,
fè nou favè pou nou akonpli sakréman Soufrans Granmèt la yon fason
pou nou mérité résévoua padon.
Pa pouvoua Jézu-Kri.
Prémié léktu
Mouin mété-ou kòm limiè nasion yo,
pou délivrans mouin rivé jous nan bout tè-a (Dézièm chan Sèvitè Granmèt la).
Léktu liv profèt Izayi 49, 1-6
Kouté, zilé yo, fè atansion, pèp ki louin yo : Granmèt la rélé-m dépi nan vant, dépi nan zantray manman-m li sonjé non-m ; li mété bouch mouin tankou yon épé pointu, li protéjé-m nan lonbraj min-l, li mété-m tankou yon flèch ki byin chouazi, li kaché-m nan sak li.
Li di-m : « Sé sèvitè-m ou yé, Israèl, paské sé nan ou m-ap jouinn gloua mouin ». Épi mouin minm mouin té di : « Sé pou granmési mouin té travay, sé san rézon ak pou anyin mouin té dépansé fòs mouin ; époutan jijman-m avèk Granmèt la, rézilta travay mouin avèk Bondié-m nan ».
Koulié-a, min sa Granmèt la di, li minm ki fòmé-m dépi nan vant pou-m kapab vîn tounin sèvitè-l, pou-m fè Jakòb tounin vîn jouinn li, pou-m rasanblé Israèl ba li, mouin jouinn gloua dévan jé Granmèt la, Bondié-m nan vîn tounin fòs mouin. Li di : « Sa pa kont pou-ou sèvitè-m pou-ou kapab lévé ras Jakòb yo, pou-ou fè débri pèp Israèl yo tounin : min mouin mété-ou kòm limiè nasion yo, pou sové m-ap sové-a rivé jous nan bout tè-a ».
Paròl Granmèt la.
Psòm répons Ps 70, 1-2. 3-4 a. 5-6 ab. 15 é 17 (R/. cf. 15)
R/. Bouch mouin ap anonsé sové ou sové nou-an, Granmèt,
1 Sé nan ou, Granmèt, mouin éspéré,
pa kité-m ront pou tout tan.
2 Nan jistis ou-a délivré-m, sové-m ;
panché zòrèy ou sou mouin, sové-m. R/.
3 Sé pou-ou sèvi-m yon ròch sitadèl,
ak yon kay défans, pou-ou sové-m,
paské fòs mouin ak kachèt mouin sé ou minm.
4 Bondié mouin, ouété-m nan min péchè-a. R/.
5 Paské sé ou minm ki éspérans mouin, Granmèt ;
Granmèt, éspérans mouin dépi-m tou jèn.
6 Sé sou ou mouin apuiyé dépi-m nan vant,
dépi nan vant manman-m sé ou minm ki soutni-m. R/.
15 Bouch mouin ap anonsé jistis ou,
tout jounin sové ou sové nou-an,
pou-m t-a konté-l, mouin pa kapab.
17 Bondié, ou ban-m ansègnman dépi-m tou jèn ;
jous koulié-a m-ap anonsé mèvèy ou yo. R/.
Vèsè anvan Évanjil la
Salu, Roua nou-an, ou minm ki obéyi Papa-a ;
yo kondui-ou pou yo klouré-ou sou koua-a,
tankou yon mouton tou dou y-ap minnin labatoua.
Évanjil
Youn nan nou ap bay mouin...
Kòk la pap chanté, ou-ap gin tan nié-m toua foua.
Léktu sint Évanjil la dapré Jan 13, 21-33. 36-38
Lè sa-a :
Jézu té sou tab avèk disip li yo, éspri-l vîn troublé, li témouagné, li di : « Amèn, amèn mouin di nou sa, youn nan nou ap trayi-m ». Disip yo youn t-ap gadé lòt, yo pa-t fîn konprann sa-l té vlé di-a.
Youn nan disip Jézu yo ki té sou tab yo té kouché sou léstonmak li, sa-a Jézu té rinmin-an. Simon Piè fè-l sign, li di-l : « Ki moun l-ap palé-a ? » Kòm sa-a té kouché sou pouatrîn Jézu, li di-l : « Granmèt, kilès ? »
Jézu réponn : « Sé sa-a m-ap lonjé pin-an mouin fîn tranpé-a ba li ». Kon-l tranpé pin-an, li bay Juda, pitit Simon Iskariòt la. Apré bouché-a, Satan antré nan li.
Jézu di-l : « Sa ou-ap fè-a, fè-l vit ». Bagay sa-a, pèsòn nan sa-k té sou tab yo pa konnin pouki sa li té di-l. Ginyin ki té konprann, kòm Juda té gin bous la, Jézu té di-l : « Achté sa nou bézouin pou jou fèt la », oubyin pou-l té bay pòv yo kichòy. Kon-l fîn pran bouché-a, li soti minm lè-a. Sé té nannuit.
Kon-l fîn sòti, Jézu di : « Koulié-a Pitit moun nan jouinn gloua li, Bondié jouinn gloua li nan li tou. Si Bondié jouinn gloua li nan li, Bondié ap fè-l jouinn gloua nan li minm tou, l-ap fè-l jouinn gloua-a tousuit.
Ti pitit mouin yo, mouin avèk nou toujou pou yon ti moman ankò. N-ap chèché-m, min jan-m té di Juif yo, “koté m-apralé-a nou pa kapab vini”, mouin di nou sa davans ».
Simon Piè di-l : « Granmèt, koté ou-apralé ? »
Jézu réponn : « Koté m-apralé-a, ou pa kapab suiv mouin koulié-a, ou-a suiv mouin apré ».
Piè di-l : « Pouki sa mouin pa kapab suiv ou koulié-a ? M-ap bay lavi-m pou ou ».
Jézu réponn li : « Ou-ap bay lavi-ou pou mouin ? Amèn, amèn mouin di-ou, kòk la pap chanté, ou-ap déja nié-m toua foua ».
Paròl Granmèt la.
- Sou ofrann yo
Sakrifis fanmi ou-an, tanpri, Granmèt,
voyé jé sou li ak byinvéyans,
épi li minm ou fè patisipé nan kado sakré yo,
fè-l favè rivé nan plénitid aboutisman yo-a.
Pa pouvoua Jézu-Kri.
Préfas II Osijè Soufrans Granmèt la.
Réf. pou kominion Rom 8, 32
Pròp Pitit li-a, Bondié pa-t ménajé-l,
min pou nou tout li té rinmèt li.
- Apré kominion
Antan nou satisfè ak kado k-ap sové nou-an,
n-ap priyé mizérikòd ou, Granmèt,
pou gras a minm sakréman sa-a,
koté ou té vlé nouri nou nan tan sa-a,
ou fè nou patisipé nan lavi ki pap janm fini-an.
Pa pouvoua Jézu-Kri.
- Priyè sou pèp la
yo kapab sèvi ak li si yo vlé
Bondié, pèp la ki rinmèt tèt li ba ou-a,
sé pou mizérikòd ou-a pròpté-l
sot anba tout ésklavaj viéyisman,
épi pou-l fè-l kapab résévoua nouvoté-a ki sin-an.
Pa pouvoua Jézu-Kri.